आवारा डंगर

जगह जगह हुई गए आवारा डंगर

खेताँ रे खेत दिते मुकाई

कइयाँ सालां ते लोक रड़ाया करदे

पर हुन्दी नी कोई सुणाई

पवें कोई बी हो सरकार

किनिये कुछ नी कितया

आवारा पशुवां रे मामले च

लोकां जो धोखा ही दित्या

रखवाली बी करदे

जे हुंदे दो चार

कियाँ इन्हां जो रोकिये

तन्जे पई जाएं बी बी ठाहर

कुटी बी नी सकदे 

दया बड़ी औंदी

ज्वाड़ नी बी करदे

तां बी मार बड़ी भारी पौंदी

किसी रा पजीरा सिंग

किसी री पंजीरी जंग

लोकें डंडे मारी मारी ने

करी दितिरे बड़े भारी तंग

क्या बोलिये तिन्हां लोकां जो

तिन्हे जे छडी रे ऐह जानवर आवारा

कई बचारे सडकां च बैठिरे

कने कई चुगया कराएं हारा

सड़का च बैठी जाओ जे

तां गडियां देंदे लोक चढ़ाई

डंडे बी मारदे कने

देंदे दुड़ाई

सरकार गौ सदन बणाई कने

बडेया कराईं फाह

इतने सारे जानवरां री 

किस करनी देखभाल

कने किता ते लयौना घाह

सरकारा जो चाहिदा

भई सबी जानवरोँ री

जनगणना कराओ

कने इन्हां जो टैग लगाओ

फेरी सैजे कोई पशु छडे

तिसजो अंदर कराओ

पर पहले इसा समस्या पर

देयो कोई ध्यान

नहीं तां भूखे मरने सब करसाण

कुछ एहड़ा करो 

ईसा समस्या रा हल

पई किसाना री जिंदगी भी

हुई जाए खुशहाल

कने तिन्हाजो मेहनती रा मिली जाए फल।

✍️ रविंदर कुमार शर्मा