देस्से जो जुआड़ीत्ता बमारी लगै घोटुआ ,
गद्दार बी न्हट्ठाईत्ते भिंडरदे चोटुआ।
बजटे च घाट्टा भाइयो बोल्ला दे सरारती,
किंह्यां-क भरोणा भला इत्थू स्हाड़ा पोटुआ?
अज्ज तां गरीबुए जो कोई बी नीं पुच्छदा ,
कंजकां दे छाप्पी गे पुट्ठे-सिद्धे फोटुआ ।
धरती तां माता स्हाड़ी सुन्ने दी ऐ चिड़िया ,
थ्होई जान तांइयों इत्थू फल़दार वोटुआ।
भाईचारा अप्पू च बणाई खूब रक्खणा ,
मिलीजुली इत्थू रैंह्णा छोटुआ ते मोटुआ ।
होण नीं 'नवीन' देणी टोट्टे-टोट्टे जिंदड़ी ,
इक्कमिक्क बन्हींत्ता ऐ जिंह्यां जे भरोटुआ ।
✍️ नवीन हलदूणवी
काव्य-कुंज जसूर-176201,
जिला कांगड़ा, हिमाचल ।
No comments:
Post a Comment