खुड्डर खुड्डर टिलर खोदा मौज़ै मौज़ै का
देख् खेचादि टिलर च़ाला मौज़ै मौज़ै का।
एऊ च़लावा गोरखै मितर मौज़ै मौज़ै का
ग्रोअर खौड़ै हासदै देखा मौज़ै मौज़ै का।
बाग् बगीच़ै धीशदै बीतै, च़ाकैनैं छीटै
काम् हौड़कौ बौच़ौ हाड़कौ गोरखी गीतै।
गम बूटा लाई घूमा ग्रोअर ओरु त पोरु
टिलर आऔ च़ैन पाई कामा का छ़ूटै।
खौणा तौलिए च़ौट कौरिए मौज़ै मौज़ै का
मशीना गाई आ दारमदार मौज़ै मौज़ै का।
छ़ाड़ी गैंती, कौष्टै, झ़ाबल मौज़ै मौज़ै का
ग्रोअर खौड़ै हासदै आरा मौज़ै मौज़ै का।
✍️ धर्म पाल भारद्वाज
No comments:
Post a Comment