देखा ईसा सरकारा रा हाल
समिन्टा रे रेट पूजी गए समाना
पर ईसा जो निया बिल्कुल भी ख्याल
ज़मीना असें दितियाँ
फैक्ट्रियां असें लवाईयाँ
धूड़ असें फकयादे
सब कुछ असांरा लई कने
फायदा फैक्ट्रियां ओले चकयादे
धूड़ स्वा बेची कने
ये तां हुई गए मालामाल
ब्लॉसपुरा ओलेयां री लई लो
मुए कोइ संभाल
पंजगाएँ रे खाले
हुइरे ए सीसी वाले दवाले
बड़े बड़े टिब्बे करी ते प्लेन
पैसे खाने जो उपरा ते थले तक
बनिगिरी एक चेन
सारे पहाड़ रूढाई ते
पर्यावरणा रा तां करी त्या बेड़ा गर्क
सुनने वाला हया नी कोई
दमे तां बनाईं ती लोकां री ज़िन्दगी नरक
सीमेंट ब्लॉसपुरा च बनदा
होर ब्लॉसपुरा च ही महंगा
बड़ा भारी अत्याचार होया करदा
पर पता नी कियाँ इथी रा माहणु सहन्दा
किसी जो नी आम मानुये री चिंता
नेते भी इथी रे चुप सारे
आम आदमी जावे दर्यावाओ
इन्हारे बनी जाने चहिदे
महल चवारे
इस बलासपुरे जो बचाने जो
सारे लावा जोर
पहले भाखड़ा डैमें मुकवाये थे
हुण फैक्ट्रियां कने फोरलेना
वालेयां दितिरा जोर
ब्लॉसपुरा वालेयां जो तां रेट हुना चाहिदा
सौ रपइये बोरी
जी नी पुग्दा मित्रो
तां बंद करो फेक्ट्री
कने चको अपनी टिंड फोड़ी
✍️ रविंदर कुमार शर्मा
घुमारवीं, हि. प्र.
No comments:
Post a Comment