घरा री छाह

असांरे करें हुंदियां थी मैंसीं तिन

दूधा दहिएँ रा नी था कोई काटा

देसी कयुवा रे परिरे हुंदे

थे टिन

अम्मा करदी थी सारा दिन

तिन्हारी  टहल कने सेवा

ताहिं तां मिलदा था

सारे टबरा जो मेवा

दूधा रा परिरा हुँदा था धधोनु

छाई ने परिरि हुन्दी थी मेंटलीयां

दिवालिया जो दूधा च मरोली ने

खाईं दियाँ थी एंकलीयां

खेतां जो मैल हुँदा था बहुत

नाज़ा रे परदे थे पेड़ू

माह,कुल्थ,रौंग कने तिल

बहुत पजदे थे

खूब खाइन्दें थे पुजड़ी कने पतेड़ू

छाई री थी बड़ी कदर 

लोग बहुत थे खांदे

भयागा कने संजा

छाई जो थे चक्कर लगान्दे

हुण सै मैसी नी रहीयां

दूधा री हुई गई तंगी

मैंटली कने मधाणी बचारी बड़ी दुखी

ओबरे रे शतीरा ने मेखा ने टंगी

गावां री छाह तां 

हुण हुईगी बन्द

मेसी गाईं बेची तियाँ

लोग करया कराएं नंद

दूध दहीं बी हुण  

आई गया पैकेट बंद

अजकल पैकेटा रिया छाई जो ही

करदे लोग पसंद

अजकला री बहु

मैसी रे नेड़े नी जांदी

गोये कने गुइन्ता ते बॉस बड़ी औंदी

घरा री छाह बड़े मुले पौंदी

माहण बेचारी भयागा ते संजा तक

सिरा ते पैरा तक पसीने ने नौन्दी

जे खाणी कुनिये घरा री छाह

तां पहले जेबा ते मैसी जो सत्तर हजार ला

गोये कने गुइन्ता ने लपोने पौणा

कने भयागा ते संजा तक बडने पौना घाह

ताईं मिलणी मित्रो 

घरा री छाह

✍️ रविंदर कुमार शर्मा