बिछड़े दोस्त दोबारा नी मिलणे

बिछड़े दोस्त दोबारा नी मिलने

तियाँ जे झड़िरे फूल दोबारा नी खिलणे

बचपना री दोस्ती 

कने जवानियाँ रा प्यार

कोई बी नी पुली सकदा

पावें जोर लावा सौ बार

बेशक अजकला री दोस्ती

बहुत कट लोग निभान्दे

दिला रियाँ गलां

हर किसी जो नी सुनान्दे

पर स्कुला री दोस्ती

हुन्दी थी खास

दोस्त भयागा ते संजा तक 

हुंदे थे आस पास

कुछ भी नी थे अपु च छुपांदे

अपनी सीक्रट गलां बी 

इकि दूजे ने थे बंडांदे

अम्ब ,काकड़िया,अमरूद

चोरदे थे बड़े पाहरी

सब नठदे थे

तन्जे औंदी थी

डंडेयाँ री बारी

खेलने भी कट्ठे थे जांदे

झूठ बी बहुत थे ग्लान्दे

रोज घड़ी रखाँ थे 

कोई न कोई छिंगड़ 

तिसजो बड़ा छेडदे थे

सैजे हुँदा था कोई बचारा जिंगड़

मास्टरां जो बी नी छडदे थे 

लग लग सबी रे नावँ थे रखदे

चाकां लायौनंदे थे चोरी कने

हर कुछ थे रस्ते च लिखदे

मास्टरां गे तन्जे हुन्दी थी शिकायत

तां किसी रा नावँ हनी थे दसदे

पुराणयां दोस्तां जो दीख़ाँ कदी पुलदे

अजकल ऐहड़े दोस्त अनि मिलदे

दोस्त हुंदे जिंदगियां च धागे साई

तिसते बिना जे कपड़े हनी सिलदे

सगे हनी हुंदे

पर सगेयाँ ते ज़्यादा फ़र्ज़  निभान्दे

मुश्कला रे बेले

एहि दोस्त कम औंदे

दोस्तां री रखो पूरी संभाल

सच्चे दोस्त हुंदे लाजवाव

एहड़ा मौका कदि नी देयो

भई कोई दोस्त हुई जाए नाराज

जे कोई रूसी जाए

तां माफी मंगी कने लवा मनाई

माफिया ते कोई छोटा नी हुँदा

यह तां देंदी दिलां च प्यार जगाई

एक बार सैजे दोस्त बिछड़ी गया

सै दोबारा नी औणा

पूरी ज़िंदगी टैम फेरी

बिना दोस्तां ते ही कटने पौणा

✍️ रविंदर कुमार शर्मा

घुमावदार, 9418093882