एहड़ा म्हारा बलासपुर प्यारा
नारसिंह बजिये जो मत्था टेको
कने झीलां रा लओ नज़ारा
एड़ा म्हारा बलासपुर प्यारा
इकि पासे धार बन्दला
सामने बसदि माता बडोली
सब अपु चिये मिली जुली रहन्दे
जनता इथी री बड़ी ही भोली
भाखड़ा डेमे ते झील तां बनी गई
पर लोकां रा हुई गया कबाड़ा
एहड़ा म्हारा बिलासपुर प्यारा
तन्जे झीलां रा पानी उत्तरदा
तां सांडूये रा मदान कने
मंदिर नज़र आउँदे
दिले पर यादां री छुरियां सै चलांदे
हिम्मत बहुत ही ब्लॉसपुरा रे लोकां बिच
किती सै सांडू गया
किती गया सै महल कने चौबारा
हुण नज़र नी औणा दोबारा
ऐड़ा म्हारा बिलासपुर प्यारा
डैम बनने ते उजड़ी गए लोग
बलासपुरा पर बिपदा थी आई
सेजे थोड़ी बहुत कसर थी
सै फोर लेने दिति गवाई
बलासपुरा कने अन्याय
हुआ बड़ा पाहरा
बिलासपुरा रे लोकां जो हुण
सिर्फ बजिये रा ही सहारा
एड़ा म्हारा बलासपुर प्यारा
सतलुज नदी शहरा रे
कने कने बगदी
ईसा री कल कल छल छल
बड़ी बांकी लगदी
ऋषिकेश जाना मिलक केक खाना
कने लैणा बोटा रा नज़ारा
एड़ा म्हारा बिलसपुरा प्यारा
गोविंद सागर झील
जालूँ लबालब भरदी
बंदले री धार बी इसा देखी
जली जली मरदी
चंदपुरे रे पुला पर खड़ी
झीलां रा फ़ोटो खिंजना
नीला नीला पानी इथी
जियाँ अम्बर बेलुये पिंजणा
बंदले री धारा ते
उड़न परिंदे मारदे छालां
एड़ा म्हारा बलासपुर प्यारा
अम्बा रा छछा,खटयाई, माणी कने बटुरु
इन्हां कने ही परी जाइँ गरनाल
हथां चटदे रही जाणा जे खादी
कुनिये बलासपुरा री तोतवीं दाल
इत्था रा खानपान सबनि ते न्यारा
एड़ा म्हारा बलासपुर प्यारा
✍️ रविंदर कुमार शर्मा
बहुत सुंदर और सटीक चित्रण बिलासपुर का, बधाई जी
ReplyDelete