स्यानयाँ रा ग्लाइरा

स्यानयाँ रा ग्लाइरा

कने आमलेयां रा स्वाद

सच्च ग्लान्दे सारे

भई बादा ते ही आउँदा याद

सयाने थे बड़े समझदार

हर किसी पर नी करदे थे एतवार

वायदे रे हुंदे थे सच्चे पक्के

बड़ा अच्छा हुँदा था

तिन्हांरा व्यवहार

घरें ही पजदा था सब कुछ

घरा रियाँ चीजां थे खांदे

बड़ा प्योर हुँदा था सब कुछ

हर कुछ नी थे बिच मलांदे

घ्यू तन्जे काढ्डे थे

तां सारे गावां च औंदी थी बास

अजकल तां मलावट करी कने

करी तरी कयुवा री सत्यानाश

वायदा करदे थे तिसजो थे निभान्दे

अजकला साही झूठ नी थे ग्लान्दे

संजकी रोटी बची जांदी थी

तां चाई कने दहिएँ ने भयागा थे खांदे

अन्न देवते जो बर्बाद नी करना

सभी जो थे ऐड़ा समझानंदे

खूब रहन्दे थे तंदरुस्त

भयागा ते संजा तक थे कमांदे

गडीयां मोटरां नी थी हुदियाँ

पैदल ई थे औंदे जांदे

पढ़े लिखे घट हुंदे थे

पर हुंदे थे बहुत अक्लमंद

हर चिज़ा जो याद रखने रे

तिन्हा रे थे अपणे ही ढंग

किलो क्विंटला रा नी था ज़माना

हुंदे थे सेर बट्टी कने धड़ी

टाइमा रा अंदाज़ा बी 

सुरजा ते थे लांदे

हुन्दी नी थी कोई भी घड़ी

न सुगरा री थी बमारी

न हुँदा था ब्लड प्रैशर

कनका खवाड़े ही गाहन्दे थे

नी हुंदे थे कोई थ्रैशर

जमाने री एहड़ी हवा चली

पुली गये सब स्यानयाँ जो

नइयां नइयां चीजां चाहिदियाँ

कोई नी पुछ्या करदा हुण पुराण्यां जो

✍️ रविंदर कुमार शर्मा

घुमारवीं