बड़ी मुश्किलां रा टाइम आई गया

कुछ तां बैठिरे करा रे अंदर

कुछ करा ते दूर

कोई बच्चेयाँ कने खेल्या करदा

कोई मिलने ते मजबूर

सारा दिन बस दो ही कम्म हे

खाना कने सौणा

मजे लगिरे अजकल मित्रो

आउँदा नी कोई बी प्रौणा

होर तां बस हुण कम्म नी कोई

न खेत देखना न बीड़

सेइ सेई कने पीठ दुखी गई

बखिया बी हुई गी पीड़ 

करा अंदर घूमी कने ही

हुन लगी गरा आउणे चक्कर

बैठे बठाये इस कारोने

देइ तरा सबी जो लक्कड़

शादियां बी लटकी गइयाँ

धार्मिक कम्म बी हुई गए बन्द

ज्यादा मुश्कल तां नेत्याओं जो हुई गई

तिन्हांरा जे उद्घाटन हुई गए बन्द

किसी रा बापू मरी गया

किसी री मरी गई अम्मा

किसी रा मरी गया पुत्र

जवान गबरू था लम्मा

अंतिम संस्कारा जो बी 

लोग नी हुए सके कठे

कई जगह तां टब्बरा रे आदमी बी 

मरीरे मानुये जो चकने रे डरा ते नठे

कारोने रे डरा रा कइयाँ रा

मुश्किलां ने होया अंतिम संस्कार

कइयाँ रे अस्तु डाला ने लटकीरे

पूजी नी सके हरिद्वार

कितनी मुश्किलां रा टाइम आया

माणु जिसदो था प्यार करदा

जे कोई कोरोना ने मरी गया

तां तिसरे नेड़े बी जाने ते डरदा

✍️ रविंदर कुमार शर्मा