कनका री बडाही

कनका री बड़ाही पई गी

बडने जो हुई जावा त्यार

दराटियाँ अपनियाँ चंडाई लो

तेज करवाई लओ धार

चन्डने वाले बी नी रहे हुण

निहालियाँ बी करी ती बन्द

जलोथरे पथरा पर पलई लो

कने चलाई लो अपना कम्म

अमाँ बापू पहन पाई

सब पूजे खेता परवाथ दिति  लगाई

दिन लगे चार

पर कनक दिति मुकाई

कनक कठि किती

लाई दिति गडयार

गाहने खातर लगी गे करने

ट्रेक्ट्रा रा इनतिज़ार

इतनिया देरा च आया तूफान

कने पया चख नेहरा

सीजी गई सारी कनक

छैब्बर पया बतेरा

खवाड़े रा ज़माना चली गया

तंन्जे बलदां ने गाहन्दे थे गाहण

प्यागा ते संजा तक बलदां जो कुमाई कने

खुश्क हुई जांदे थे प्राण

कड़याठिया ने देंदे थे छेड़ा

कने सूपा ने करदे थे पुनाई

तुपा ने सिरा री हुई जांदी थी पटाक

सुपलिया ने बी करी लैंदे थे छंड फ़ड़ाक

सूपा चकी ने खड़े रहन्दे थे

बागरिया री करदे थे निहाल

घंटे बाद आउँदा था किते ईक लवाटा

निहाली ने हुई जांदा था बुरा हाल

दानेयाँ भरने जो हुँदा था छकू

भुआ टोने जो खारा

बेरड़ा बांदे थे  खेतें

मंडल बी हुँदा था बहुत सारा

खेता रे कंडे कंडे ब्युली थे बांदे

तितरा जे सेल कने पंगयाठु थे बनान्दे

ब्युलिया रे बनाईंदे थे माला जो रस्से

मंडला री बनाइन्दी थी रोटी

स्वाद बड़ा लाजबाब पावें हुन्दी थी मोटी

अजकल ट्रेक्ट्रा ने ही कनका जो गाहन्दे 

कम्म पवे हुई जांदा जल्दी

पर सतवाँ पीपा देंदी हाण

अग्ग सीने च बल्दी

बेशक अजकल सबी चीजां रियाँ

नविंया मशीना आई गियाँ

पर बरोजगारी बदी गई 

पुशतैनी पेशे ख़त्म कराई  गियाँ

✍️ रविंदर कुमार शर्मा