कोरोना री दहशत

कोरोना रे हुण हिंदुस्ताना पर  बी
बदल घिरे नेहरे
फैली गी ईसरी दहशत
हुण चउँ चफेरे
अपणी अपणी सलाह देया करदे
बनी गए सारे डॉक्टर
सोशल मीडिया पर बी चली पया
हुण अफवाहां रा बबंडर
स्कूल कालेज मेले बी हुण
हुई गए बन्द सारे
चीना साही मुलखा जो बी
इने दसी ते तारे
अमरीका बी हुई गया तंग
इटली कने ईरान बी परेशान
सारेयाँ देशां च पूजी गया ये
लई ली इने कइयाँ री जान
डब्ल्यू एच ओ ने बी
करी त्या एलान ये तां अई महामारी
म्हारे मुलखे बी करी लई
इसने लड़ने री त्यारी
विदेशां च तां हुण
हत्थ मलाणा बी हुई गया बन्द
हिन्दुस्ताना रिया नमस्ते जो
करया करदे लोग पसंद
कइऐं लोकें कोरोना रे नावां पर
मचाई दिति हुण लूट
सेनेटाइजर कने मासकां री कीमतां बढ़ाई ती
हुई गई चालू लूट खसूट
डरने री नी कोई गल्ल
मना च रखो विश्वास
जे कुछ साबधानियाँ बरतगे
तां कोरोना नी औणा आस पास
हत्थां जो रखो बिल्कुल साफ
थोडीया दूरिया ते गलाओ
छिक खंग जे हुई जाए तां मुहाँ पर रखो रुमाल
कने नेड़े बिल्कुल नी जाओ
होर नमस्ते ने ही कम्म चलाओ
सबी जो मिली कन्ने हुण पूरा जोर लगाणा
हिन्दुस्ताना जो इस कोरोना रे खतरे ते बचाणा

✍️ रविंदर कुमार शर्मा